Thursday, January 13, 2011

கடவுளும் பகுத்தறிவும்

நிறைய பேர் என்னிடம் கேட்கும் கேள்வி, "உங்களுக்கு கடவுள் நம்பிக்கை இல்லையா?"

அது சரி, கடவுள் நம்பிக்கை இல்லை என்றால் பகுத்தறிவுவாதியாமே, அப்படியா?

கடவுள் இருக்கிறாரா அல்லது இல்லையா என்று எனக்குச் சத்தியமாகத் தெரியாது. அதனால் கடவுள் இருக்கிறார் என்றோ, இல்லை என்றோ சொல்ல எனக்குத் தகுதி இல்லை. ஆனால் ஒன்றை மட்டும் என்னால் நிச்சயமாகச் சொல்ல முடியும்.....என்ன அது?



மக்களே, கடவுள் இருந்தால் என்ன, இல்லாவிட்டால் தான் உங்களுக்கு என்ன?

ஓஹோ, கடவுள் இருப்பது ஒரு வேளை உண்மையாக இருந்தால் அவரை வணங்க வேண்டுமே என்று கவலைப்படுகிறீர்களா?

அட போங்க நீங்க. கடவுள் உங்களையும் என்னையும் படைத்தது உண்மையானால், அவர் கண்டிப்பாக மிகப் பெரிய படைப்பாளி. நிச்சயமாக ஓர வஞ்சனை செய்ய மாட்டார். அவர் என்ன ஊழல்வாதியா, தன்னை வணங்குபவர்களுக்கு மட்டுமே நல்லது செய்ய?

அப்படியே தனது படைப்புகள் அனைத்தும் தன்னை வணங்க வேண்டும் என்று அவர் கருதினால் ஒவ்வொரு படைப்பிடமும் அந்த விடயத்தை முறைப்படி தெரிவிக்க வேண்டியது அவரின் கடமை அல்லவா?

அவர்தான் ஏற்கனவே தனது தூதர்கள் அல்லது அவதாரங்கள் மூலமாக தெரிவித்து விட்டாரே என்கிறீர்களா?

நண்பரே, பத்து பதினைந்து புத்தகங்களைக் காட்டி, இதைக் கடவுள் தான் தந்தார் என்று நீங்கள் சொன்னால் அதை எப்படி நான் நம்ப முடியும்?

ஆதலால் கடவுள் இருந்தால் இருந்து விட்டுப் போகட்டும். இல்லை என்றாலும் எனக்குக் கவலை இல்லை. நான் எனது வழியைப் பார்த்துப் போய்க்கொண்டே இருப்பேன். எனக்குத் தெரியாத ஒன்றை ஏளனமாகப் பேசுவதோ அல்லது பாராட்டி சரணடைவதோ எனது வேலை இல்லை. நீங்கள் எப்படி?

"கடவுளை மற மனிதனை நினை" என்ற வாக்கியம் எனக்கு நிரம்பப் பிடிக்கும், ஒரு சின்ன திருத்தத்துடன். அது "கடவுளை மற, உலகை நினை".

என்னைப் பொறுத்தவரை, மனிதனை மட்டுமல்ல, எல்லா உயிர்களையும்...ஏன், உயிரற்ற இன்ன பிறவற்றையும் நினைக்க வேண்டியது நமது கடமை..நமக்கு முன் இவ்வளவு பணிகள் இருக்கும் பொழுது ஏன், தெரியாத ஒன்றைப் பற்றி அலட்டிக் கொள்ள வேண்டும்? அதை மறந்து விடலாமே?

ஆனால் கடவுளை எதிர்ப்பது தான் பகுத்தறிவுவாதம் என்றால், மக்களே, சத்தியமாக நான் பகுத்தறிவுவாதியல்ல...நீங்கள்?

பின் குறிப்பு:
--------------
நண்பர்களே, பதிவு பிடிச்சிருந்துன்னா சிரமம் பார்க்காம ஓட்டும் போட்டுடுங்களேன்,,,

6 comments:

sakthistudycentre-கருன் said...

உங்களுக்கும் என்னுடைய இனிய மனமார்ந்த போகி, பொங்கல், மாட்டு பொங்கல், மற்றும் பூப்பொங்கல் நல்வாழ்த்துக்கள்.
இன்னும் இரண்டு நாளைக்கு பின்னூட்டம் இதுதான்...

VELU.G said...

நல்ல கருத்துள்ள பதிவு நண்பரே

தங்களுக்கு எனது பொங்கல் வாழ்த்துக்கள்

உலவு.காம் (தமிழர்களின் தளம் வலைபூக்களின் களம் - ulavu.com) said...

இனம் மறந்து இயல் மறந்து
இருப்பின் நிலைமறந்து
பொருள் ஈட்டும் போதையிலே
தமிழின் தரம் மறந்த தமிழனுக்கு
நினைவூட்டும் தாயகத் திருநாள்

உழவர் திருநாள் வாழ்த்துக்கள்!

Moorthy said...

கடவுள் பெரசொல்லி இங்க இவங்க பண்றதெல்லாம் தாங்க முடியல.
நான் நினைச்சதை அப்படியே சொல்லிடீங்க.

ஞாஞளஙலாழன் said...

நன்றி கருண், வேலு.

ஞாஞளஙலாழன் said...

நன்றி மூர்த்தி. உண்மை தான். இதற்கு ஒரு முடிவே இல்ல போல.

Post a Comment